لفظ مواطن أنفاسه بعد عملية شفط دهون في مستشفى طيبة كلينك

بطلب من ولد عمة احمد جاسم الرومي ننقل لكم الحدث
أجريت له في مستشفى خاص دفع قيمتها 1200 دينار بواسطة (الكي نت).
ذوو الشاب أحمد الرومي
خليكم مع المقال الرئيسي
الأخيرة - وفاة مواطن عشريني بعد عملية شفط دهون
عبدالله نوري الرومي:
بسم الله الرحمن الرحيم انا اخو المتوفي الله يرحمه , اول شي جزاكم الله خير كلكم و كل الي تفاعل مع الموضوع , طبعا العياده اهي طيبه كلينك الله يلعنها , قصوا علينا و اهمونا من الساعه 3 لي الساعه 11 انا اخوي مافيه ولا شي و حالته شبه مستقره , و الساعه 3 مدير المستشفى سند الفضاله قعد يهدينا و قال انه الحراره نزلناها الى 35.9 و ورانه هالشي بالشاشه , و قالنا انه حالته مستقره و مافيه الا الخير ولا تفاولون على الولد , و سألناه اذا كان يستوجب نقله الى مستشفى ثاني او الى الخارج حتى لو يكون أفضل بـ 1% , طبعا قعد يقول انه والله العظيم انه مستشفاه احسن مستشفى بالكويت واجهزته لا تظاهيها اجهزه و دكاترته احسن دكاتره

و انه الحين 10 دكاتره واقفين على راس الولد و يقول انه حتى العناية المركزة ما نقدر ننقله شلون تبونه نوديه مستشفى ثاني !! ( يناقض نفسه ) , و الولد الحين قاعد يتحسن و ان شاء الله كلها ساعتين و ننقله الى غرفه العناية المركزة و من ثمه الى الغرفه , و كل شوي يعيد لنا نفس الاسطوانه لي الساعه 9 و كل شوي يدخلون أكياس دم و مع اتصال ببنك الدم اكتشفنا انه تم طلب 18 كيس دم من مكونات دم و بلازما و صفائح دم مع انه الانسان الطبيعي يحتاج الى كيسان فقط !!

و في الساعه 9 ونص استدعانه سند الفضاله مدير المستشفى بعد ان اوهمنا انه حالت الولد مستقره و قص علينا و قعدنه بالجناح بالدور السادس , استدعانه و قال الولد لازم نوديه مستشفى ثاني @@ طبعا كلنا فزينا و عصبنا و طبعا ما يعرف يرد ما عنده غير بارك الله فيكم , يقول لازم نوديه مستشفى العدان لأنه مستشفى العدان امكانياته افضل من مستشفانه @@ قبل كم ساعه قعدت تبجي و تقول مستشفاك افضل مستشفى , و قلنا لا حول ولا قوة الا بالله نوديه مستشفى العدان , نزلنا تحت عند الاسعاف عشان ننطر المرحوم و نشوفه على الاقل لأنه طول المده كان بالعمليات و ممنوع نشوفه , نطرناه من الساعه 9 ونص لي 10 ونص تقريبا و الاسعاف كانت فاضيه من داخل حتى مافيها سرير او اكسجين او اي جهاز , و سند الفضاله كان قايل لنا انه الاسعاف مجهزه كأنها غرفه عمليات , شوي ولا ينادينه سند الفضاله و يقولنا بأسلوب قذر : وين اخوك الكبير ؟ ناديت له اخوي الكبير , اخوي قاله ها شفيه اخوي ؟ رد سند : لأ ما فيه شي بس سكته قلبيه @@ , الله يرحمه ان شاء الله

, قلنا انزين بنشوف اخونا قال ما عليه الحين اوريكم , دشينا على المرحوم و على اساس انه توه متوفي , و المعروف انه جسمه لازم يكون حار لأنه الدم لي الحين بجسمه , بست راسه ولا باسه باااااارد , معناته انه كان بالثلاجه و الله اعلم متى توفي , و الصحفي عبدالله الدوسري ما قصر و من مباحثاته مع المستشفى اتضح انه اخوي توفى الساعه 7 و طول المده سند الفضاله كان يظحك علينا , و طبعا احنا ما رضينا انه تتشرح الجثه لأنه يطول 4 او 5 ايام و اكرام الميت دفنه

, و ان شاء الله احنا ما راح نسكت و والله ثم والله انه مو غرضنا الماده ولكن عشان لا يذبحون عيالنه و احنا ساكتين , و نسيت اذكر انه المستشفى ما سوا تحاليل دم للمرحوم و المرحوم دخل المستشفى بريله صاحي قبل العمليه بنص ساعه فقط . إنا لله و إنا اليه راجعون
ترى الدكتور اللي مسويله العملية>>>>> هاشم عياد

انا لله وانا اليه راجعون الله يرحمه .. ما الوم اخوه بصراحه .. على هالطريقه والاسلوب اللي تعامل فيها معاهم الدكتور لما نقلهم الخبر .. والله شي يقهر

مشكووره الحزن

مشكوووره علي المرور

حيل شي يقهر الواحد

الحين مستشفى العدان عنده إمكانيات أفضل!!!!!!!

مشكورة على الخبر

الله يرحمه إن شاء الله... مشكوورة على الموضوع يا الحزن عنواني..

العفو حياج الله