لو البكا يرجعك يابوي لاأبكيك

يبه شلونكـ ...
ملل هالــكــون من دونكـ ..
يبه شلونكـ ؟؟
وتمضي رحلة الدنيا..بليا طلة عيونكـ ..؟؟!!
يبه شلونكـ ؟؟
وشلون المرض وياك ؟؟
بعد ماهدك بدنياك..
عساها تغمضـ جفونكـ ؟؟
تبي تدري عنــ احبابكـ ؟؟
عنــ عيون تغنابكـ ؟؟
عن قلوبـ دفنها الشوق..
واذا جاها الغفا جابكـ ؟؟

يبه امي تخيلك دوم...
تغني لك مع القمرا..
يبه واللي خذاك بيوم....
خذا بنيتك بكرا..
خذا.. وياما خذا..
وياما..خذا ناس يحبونكـ ..

يبه حنا صرنا كبار..
توفقنا وتخرجنا..
يبه ماعاد فيه صغار..
يموج بهالزمن كل شي..
وحنا ماتموجنا ..
على ذاك العهد نسريـ ..
نبيع العمر والدنيا ..
ولا تخلف بنا ظنونكـ ...
يبه شلونكـ ؟؟
تبي تدري عن اخباري ؟؟
عن افكاري وتذكاري ؟؟
اشيلك داخلي جمره ..
وبعيون الحزن عبره..
تغرقني .. وتحرقني..
اشوفك نجمة تجبر..مراعيها .. يراعيها..
واشوفك للرجوله اسم..اذا شد الزمن تقسى..
واحلم من معاني الحلم..احسك مقبل بكرى..
وعيا لايجي بكرى !!

يبه تذكر زمان مر؟؟
يبه تذكر مجالسنا ؟
مقلطنا ومجلسنا ؟
وحارتنا ومسجدنا ؟
يبه تذكر هدايا العيد ؟
صلاة العيد؟ وبشت العيد؟
يبه تذكر سوالفنا ؟
لاجل هذا .. وكل هذا ..
اقول اليوم يايبــه ..
مــــلل هالــكـونـ من دونكـ
يبه وينكـ ؟؟ ....
ولهت لنظره من عينك ....
يبه وينكـ ؟؟
اشوفه طوّل غيابكـ !! ...
و من ودّاك .... ما جابك !!
قالوا ما يدوم الزينـ !! ...
و أنا عندي امل للحين ..
و لا كني اعرفكـ وين !!

يبه وينكـ ؟؟
عسى الداعي يبه بس خير ؟!!
عساك بخير ....
مداين تكرمـ لعينك ...
بس ارجوكـ علمني ...
علمني .. يبه وينكـ ؟؟
سألت امي عن رجوعك ...
ولا كني اعرفكـ وين !!
و قالت .. ما يدومـ الزين !! ... و أنا .. عندي املـ للحين ..
في رجوعكـ !! ....
يبه بس تكفى علمني ....
متى رجوعكـ ؟؟ ....
يبه بس تكفى علمني ...
وش احلى من طلوع اثنين ؟؟
طلوعـ الشمس ... و طلوعكـ

يبه وينكـ ؟؟
سألت امي .... غيابكـ طال ؟؟
ولا كنّي اعرفكـ وين !!
و قالت مثل ما قالتـ ...
حسافهـ ...
ما يدوم الزينـ ...
مع كل هذا صدقني ..
أنا عندي امل للحينـ !!
سؤالي عنكـ يالوالد ..
صار كما الموالـ
و اشوفه طالـ ... والله طالـ ..
حزينـ .. بلحنه و حروفه ... يخافـ .. يموت من خوفه ...
و قلب ٍ كان اقوى قلب ... ضعف .. من قسوة ظروفه ..
يبه .. أرجوكـ علمني ...
تشوف اللي أنا أشوفه ؟؟
أنا أشوفكـ نهار و ليل ...
في وسط المجلس تصلي ..
و تدعي الرب ييسر لي ..
يبه .. ما عاد بي من حيل .. وين الحيل ؟؟
و أنا أشوفكـ نهار و ليل ..
مع إني أدري ما ترجع !!
غريبه .. بعدها تدمع .. عيوني من هموم البين !! ....
و ادريبه مكانكـ وين !! ...
مع َ هذا .. ارد و اسأل !!
يبه .... وينكـ ؟؟
و لا كني اعرفكـ وين !!
شبكت العشر في غيابك ...
على راس ٍ كساه الشيب ..
و من وداك ... ما جابك ..
و لا ادري وش يخبي الغيب !! ...
و جرح ٍ عذ ّب احبابك .... يبه ..عيّا يخف و يطيب !!
يبه.. كل جرحـ في الدنيا .. مصيره بالدوا يلتم ...
و لكن البلا من جرح .. نزف فرقاك ... بليّا دم !! ...
و هذا الفرق في جرحي ...
عجز يلقا الدوا دكتور ..
أنا جرحي غريب الطور !!!
ينزف ... بس بليّا دم .. و زاد الهم فوق الهم ...
و دام انك يبه غايب ...
جروح الغيبه ما تـلتم ..
بس عندي امل للحين !! ...
و لا كنّي اعرفكـ وين !!

يبه .. ذكراكـ تفرحني ....
في نفس الوقت تجرحني !! ...
لا من جبت في طاريك ...
دموعي غصب تفضحني ....
يبه .. تذكر ليالي الصيف ؟؟
عرس الحي .. و رقص السيف ؟؟
و كرم قلبكـ معَ هالناسـ ... كل ٍكان في بيتكـ ضيف ...
ألا يا حيف ... ألا يا حيف ...
زمن قاسي ... زمن قاسي ...
أخذ مني بلا رحمه ... أخذ مني أعز ناسي !!
و خلاّ لي سهر هالليل ..
في عيني ضيف .. ألا يا حيف !!
يبه وينكـ ؟؟ تعال و شوف ...
كبرنا مثل ما تمنيت ... درسنا كل ما حبيت ...
نصلي مثل ما وصيت ...
و ندعيلكـ في كلـ ظروف ..
يبه وينكـ ؟؟ تعال و شوف ..
صحيح الدنيا ما ترحم ..
تجرعنا التعب أنواع ... و لكن الأمل ما ضاع ..
و أنا عندي أمل للحين !! ...
و لا كني اعرفكـ وين !!

يبه تذكر شطانـتـنا ؟؟
أنا و اخواني و اخواتي ... معانا عيال حارتنا ...
نلعب في زوايا البيت .. يبه ... والله أنا حنيت ..
لذاك الوقت في وجودكـ ...
ألا يا ريت ... ألا يا ريت ...
ترجع .. يا يبه حنيت ..
حسافه الدنيا ما ترحم ...
خذت منا سعادتنا ... خذتك بعيد .. و خلتنا !!!
يبه امي تذّكرنا ... بأيامك قبل ما تروح ...
تناديها.. يا روحـ الروح ..
تغازلها و تنظر لك ..
مثل طفله ... ملامحها عشق مفضوح ...
في ذاك الوقت .. كنا صغار ...
معَ هذا ... كنا نغار ..
عليها .. أو بعد منها ... كنا نغار
نحبك يا يبه ... ارجع ...
مثل شمس الفجر .. اطلعـ
حزينه الشمسـ في غيابك ..
و نفس الحزنـ في احبابك ..
وأخاف الشمسـ من حزني ..
تغيب و ما بعد تطلع !! ..
يبه ارجع !! ...
اذا لي خاطر فـ قلبك ..
تعال و زورنا بس يوم ...
مع انه ما يكفينا .. نشوفكـ يوم ..
نبي حضنكـ يدفينا .. و نشوفكـ دوم ..
لكن قلّت الحيله ...
و يمكن مـ البطا ضاعت .. و قلنا يوم !!

يبه سامحني بترخّص ... قبل ينشف حبر الأقلام ..
كلامي بعده ما خلّص ..
و لكن موعد الأحلام .. حان ..
ولازم اوفي له..
بعد ما ضاعت الحيله ..
أشوفك والوعد باكر !!
إذا فكّر يجي باكر ..!! ..
و برجع اسألك وينكـ !!
بس لازم تجاوبني ..
ترى عندي امل للحين !! ..
و لا كني اعرفكـ وين ..!!
يبه شلونكـ ؟
مــلل هالـكونـ من دونك
يبه شلونكـ ؟
وتمضي رحلة الدنيا ... بليا طلة عيونكـ
لاجل هذا ... وكل هذا ... اقول اليوم يابـيـي

ملل هالكون من دونك